చెన్నై: దళపతి విజయ్ కథానాయకుడిగా నటించిన పొలిటికల్ యాక్షన్ డ్రామా ‘జన నాయగన్’ విడుదలకు ముందే బాక్సాఫీస్ వద్ద సంచలనం సృష్టిస్తోంది. జూలై 23న ప్రపంచవ్యాప్తంగా విడుదల కానున్న ఈ చిత్రం అడ్వాన్స్ బుకింగ్స్లోనే భారీ స్పందనను అందుకుంటోంది. రాజకీయాల్లోకి పూర్తిస్థాయిలో అడుగుపెట్టే ముందు విజయ్ నటించిన చివరి సినిమా కావడంతో అభిమానుల్లో భారీ అంచనాలు నెలకొన్నాయి.
అడ్వాన్స్ బుకింగ్స్ ప్రారంభమైన కొద్ది గంటల్లోనే ఈ చిత్రం దేశవ్యాప్తంగా తొలి రోజు కోసం రూ.10.60 కోట్లకు పైగా గ్రాస్ వసూళ్లు నమోదు చేసింది. విడుదలకు ఇంకా సమయం ఉండగానే ఈ స్థాయి స్పందన రావడం ట్రేడ్ వర్గాలను ఆశ్చర్యానికి గురిచేస్తోంది.
దర్శకుడు హెచ్. వినోద్ తెరకెక్కించిన ఈ చిత్రం తొలుత సంక్రాంతి సందర్భంగా విడుదల కావాల్సి ఉన్నప్పటికీ, సెన్సార్ సంబంధిత కారణాలతో దాదాపు ఏడు నెలలు వాయిదా పడింది. అయినప్పటికీ విజయ్ క్రేజ్ ఏమాత్రం తగ్గలేదని అడ్వాన్స్ బుకింగ్స్ గణాంకాలు స్పష్టం చేస్తున్నాయి.
ఆదివారం ఉదయం నాటికి దేశవ్యాప్తంగా 4,314 షోలకు 4.35 లక్షలకు పైగా టికెట్లు అమ్ముడయ్యాయి. రాష్ట్రాల వారీగా చూస్తే తమిళనాడులో రూ.4.87 కోట్లు, కర్ణాటకలో రూ.3.04 కోట్లు, కేరళలో రూ.1.69 కోట్లు అడ్వాన్స్ బుకింగ్స్ నమోదయ్యాయి. ఒక్క చెన్నైలోనే 86 శాతం ఆక్యుపెన్సీతో రూ.1.18 కోట్ల వసూళ్లు రావడం విశేషం. హైదరాబాద్, కోయంబత్తూర్, కొచ్చి వంటి ప్రధాన నగరాల్లోనూ ఈ చిత్రానికి మంచి స్పందన లభిస్తోంది.
భాషల వారీగా పరిశీలిస్తే తమిళ వెర్షన్ ద్వారా రూ.10.17 కోట్లు, తెలుగు వెర్షన్ ద్వారా రూ.42.21 లక్షలు అడ్వాన్స్ బుకింగ్స్ రూపంలో వసూలయ్యాయి. రానున్న రోజుల్లో బుకింగ్స్ మరింత వేగం పుంజుకునే అవకాశం ఉందని ట్రేడ్ విశ్లేషకులు అంచనా వేస్తున్నారు.
ఈ చిత్రంలో పూజా హెగ్డే కథానాయికగా నటించగా, బాబీ డియోల్, ప్రకాశ్ రాజ్, గౌతమ్ వాసుదేవ్ మీనన్, ప్రియమణి కీలక పాత్రల్లో కనిపించనున్నారు. అనిరుధ్ రవిచందర్ సంగీతం అందించిన ఈ సినిమా ఈ ఏడాది కోలీవుడ్లో అత్యధిక ఓపెనింగ్స్ సాధించే చిత్రాల్లో ఒకటిగా నిలిచే అవకాశాలు కనిపిస్తున్నాయి.
