చెత్త గుట్టల మధ్య చితికిపోతున్న జీవనాలు.. జవహర్‌నగర్ డంపింగ్ యార్డుతో ప్రజల నరకయాతన

భరించలేని దుర్వాసన.. రాత్రిళ్లు నిద్రపట్టని పరిస్థితి.. దోమలు, ఈగల బెడద.. పెరుగుతున్న వ్యాధులు.. కలుషితమవుతున్న భూగర్భ జలాలు.. జవహర్‌నగర్ డంపింగ్ యార్డు పరిసర ప్రాంతాల ప్రజలు ప్రతిరోజూ ఎదుర్కొంటున్న దుర్భర జీవితం ఇది.

గ్రేటర్ హైదరాబాద్ పరిధిలో రోజూ సేకరించే సుమారు 8 వేల మెట్రిక్ టన్నుల చెత్తతో పాటు నగర శివారులోని 17 మున్సిపాలిటీల నుంచి వచ్చే వ్యర్థాలను జవహర్‌నగర్ డంపింగ్ యార్డుకు తరలిస్తున్నారు. దీంతో ప్రతిరోజూ దాదాపు 10 వేల మెట్రిక్ టన్నుల చెత్త ఇక్కడ పేరుకుపోతోంది. రోజుకు సుమారు 400 లారీల ద్వారా చెత్త తరలించడంతో వంద మీటర్లకు పైగా ఎత్తులో చెత్త గుట్టలు ఏర్పడుతున్నాయి.

కాలుష్యంతో విలవిలలాడుతున్న ప్రజలు

డంపింగ్ యార్డు నుంచి వెలువడుతున్న దుర్వాసన, కాలుష్యం కారణంగా పరిసర ప్రాంతాల ప్రజలు తీవ్ర ఇబ్బందులు ఎదుర్కొంటున్నారు. ముఖ్యంగా చర్మ, శ్వాసకోశ సంబంధిత వ్యాధులు పెరుగుతున్నాయని స్థానికులు ఆందోళన వ్యక్తం చేస్తున్నారు. భూగర్భ జలాలు, చెరువులు కలుషితమవడంతో తాగునీటి సమస్య కూడా తీవ్రంగా మారింది.

డంపింగ్ యార్డును తరలించాలని ప్రజలు ఎన్నోసార్లు ఆందోళనలు చేపట్టినా, అధికారుల నుంచి స్పష్టమైన చర్యలు కనిపించడం లేదని స్థానికులు ఆరోపిస్తున్నారు.

రీసైక్లింగ్ సామర్థ్యం తక్కువే

రోజూ వేల టన్నుల చెత్త వస్తున్నప్పటికీ, జవహర్‌నగర్‌లో ఉన్న శుద్ధి కేంద్రం రోజుకు కేవలం 2 వేల మెట్రిక్ టన్నుల చెత్తను మాత్రమే ప్రాసెస్ చేయగల సామర్థ్యం కలిగి ఉంది. 24 మెగావాట్ల విద్యుత్ ఉత్పత్తి సామర్థ్యం ఉన్న ప్లాంట్‌లో కూడా కేవలం 1,200 మెట్రిక్ టన్నుల చెత్తనే వినియోగిస్తున్నారు.

మొత్తం 10 వేల మెట్రిక్ టన్నుల వ్యర్థాల్లో రోజుకు సుమారు 3,200 మెట్రిక్ టన్నుల చెత్త మాత్రమే రీసైక్లింగ్ అవుతోంది. మిగిలిన చెత్త గుట్టలుగా పేరుకుపోవడంతో దుర్వాసన మరింత పెరుగుతోంది.

అంతేకాకుండా వందలాది చెత్త లారీలు రాకపోకలు సాగించడంతో పరిసర రహదారులు దెబ్బతింటున్నాయి. ద్విచక్ర వాహనదారులు దుర్వాసనతో పాటు చెత్త కణాలు ఎగిరి పడుతుండటంతో తీవ్ర ఇబ్బందులు పడుతున్నారు.

20 గ్రామాల్లో 5 లక్షల మందికి ఇబ్బందులు

జవహర్‌నగర్ డంపింగ్ యార్డు ప్రభావం ఘట్‌కేసర్, ఉప్పల్, కీసర, కాప్రా మండలాల పరిధిలోని 20కిపైగా గ్రామాలపై పడుతోంది. జవహర్‌నగర్, అంబేద్కర్‌నగర్, ప్రగతినగర్, కార్మికనగర్, రాజీవ్‌గాంధీనగర్, గబ్బిలాలపేట, చీర్యాల, మల్కారం, హరిదాస్‌పల్లి, అహ్మద్‌గూడ, దమ్మాయిగూడ, నాగారం, రాంపల్లి, యాప్రాల్ తదితర ప్రాంతాల ప్రజలు కాలుష్యంతో సతమతమవుతున్నారు.

తమ ఇళ్లను విక్రయించి వేరే ప్రాంతాలకు వెళ్లాలన్నా కొనుగోలుదారులు ముందుకు రావడం లేదని స్థానికులు వాపోతున్నారు. ముఖ్యంగా వర్షాకాలంలో పరిస్థితి మరింత దారుణంగా మారుతోందని చెబుతున్నారు.

మురికికూపాలుగా మారుతున్న చెరువులు

డంపింగ్ యార్డు నుంచి వెలువడుతున్న కలుషిత జలాలు సమీప చెరువుల్లోకి చేరి వాటిని పూర్తిగా కాలుష్య కాసారాలుగా మారుస్తున్నాయి. చెన్నపురం, మల్కాపురం, బాపుఖాన్, ఇందిరమ్మ, ఈదులకుంట, గుండ్లకుంట, ఎర్రకుంట వంటి చెరువులు తీవ్రంగా ప్రభావితమయ్యాయి.

వర్షాకాలంలో చెత్త గుట్టల నుంచి వెలువడే వ్యర్థ జలాలు చెరువుల్లోకి చేరి నీటి నాణ్యతను పూర్తిగా దెబ్బతీస్తున్నాయని స్థానికులు చెబుతున్నారు. దీనివల్ల జలచరాలు కూడా మనుగడ సాగించలేని పరిస్థితి ఏర్పడిందని ఆందోళన వ్యక్తం చేస్తున్నారు.

పరిష్కారం కోరుతున్న ప్రజలు

డంపింగ్ యార్డును జనావాసాలకు దూరంగా తరలించాలని స్థానిక ప్రజలు ప్రభుత్వాన్ని కోరుతున్నారు. భూగర్భ జలాలు కలుషితమవడం, ఆరోగ్య సమస్యలు పెరగడం, చెరువులు నాశనం కావడం వంటి అంశాలపై తక్షణ చర్యలు తీసుకోవాలని డిమాండ్ చేస్తున్నారు.

పర్యావరణ పరిరక్షణపై ప్రభుత్వం ప్రత్యేక దృష్టి సారిస్తున్నట్లు చెబుతున్నప్పటికీ, జవహర్‌నగర్ పరిసర ప్రాంతాల సమస్యలను కూడా అత్యవసరంగా పరిష్కరించాలని స్థానికులు కోరుతున్నారు.