దిల్లీలోని జంతర్ మంతర్ వద్ద ఒక్కసారిగా వాతావరణం మారిపోయింది

నీట్ పరీక్షల వివాదంపై నెల రోజులకు పైగా సాగుతున్న విద్యార్థుల ఆందోళనలో కీలక పరిణామం చోటుచేసుకుంది. కేంద్ర విద్యాశాఖ మంత్రి ధర్మేంద్ర ప్రధాన్ తన పదవికి రాజీనామా చేశారన్న వార్తతో దిల్లీలోని జంతర్ మంతర్ వద్ద ఒక్కసారిగా వాతావరణం మారిపోయింది. ఆందోళనకు నాయకత్వం వహిస్తున్న కాక్రోచ్ జంతా పార్టీ (సీజేపీ) వ్యవస్థాపకుడు అభిజీత్ దీప్కే ముఖంలో చెప్పలేని ఆనందం వెల్లివిరిసింది.

జంతర్ మంతర్ వద్ద నిరసన కొనసాగుతుండగా, అభిజీత్ దీప్కే ఫోన్‌లో సమాచారం అందుకున్నారు. మంత్రి రాజీనామా విషయం తెలియడంతో, వెంటనే ఉత్సాహాన్ని ఆపుకోలేకపోయిన అతడు, మైక్ అందుకుని "మనం సాధించాం! We have done it!" అంటూ గట్టిగా నినదించారు. ఈ ప్రకటనతో అక్కడున్న విద్యార్థులు, కార్యకర్తలు ఆనందోత్సాహాల్లో మునిగిపోయారు. ఒకరి భుజాలపై ఒకరు చేతులు వేసుకుని, నినాదాలు చేస్తూ తమ విజయాన్ని చాటుకున్నారు.

నీట్-యూజీ 2026 పేపర్ లీక్, పరీక్షల వ్యవస్థలో లోపాలు, విద్యార్థుల ఆత్మహత్యలపై సీజేపీ ఆధ్వర్యంలో విద్యార్థులు గత కొన్ని వారాలుగా జంతర్ మంతర్ వద్ద దీక్ష చేస్తున్నారు. ఈ నేపథ్యంలోనే ప్రభుత్వం దిగివచ్చి మంత్రి రాజీనామాకు అంగీకరించినట్లు తెలుస్తోంది.

అయితే, ఇది తమ పోరాటంలో తొలి విజయం మాత్రమేనని అభిజీత్ దీప్కే అన్నారు. "ఇది సంపూర్ణ విజయం కాదు. కేవలం మొదటి అడుగు మాత్రమే. 21 మంది విద్యార్థుల ప్రాణాలకు న్యాయం జరగాలి. మా పోరాటం కొనసాగుతుంది" అని ఆయన స్పష్టం చేశారు. మంత్రి రాజీనామా విద్యార్థుల పోరాటానికి నైతిక బలాన్ని ఇవ్వగా, పరీక్షా వ్యవస్థలో పూర్తిస్థాయి సంస్కరణలు చేపట్టే వరకు ఉద్యమం ఆగదని విద్యార్థి సంఘాల నేతలు చెబుతున్నారు.