ఏపీ మద్యం రవాణా స్కామ్ కేసు: మాజీ మంత్రి కుమారుడితో సహా ముగ్గురికి ఈడీ కస్టడీకి కోర్టు అనుమతి
హైదరాబాద్: ఆంధ్రప్రదేశ్లో గత వైసీపీ ప్రభుత్వ హయాంలో జరిగినట్లు ఆరోపణలు ఎదుర్కొంటున్న మద్యం రవాణా కుంభకోణం కేసులో కీలక పరిణామం చోటుచేసుకుంది. ఈ కేసులో ముగ్గురు ప్రధాన నిందితులను మూడు రోజుల పాటు కస్టడీలోకి తీసుకుని విచారించేందుకు ఎన్ఫోర్స్మెంట్ డైరెక్టరేట్ (ఈడీ)కి హైదరాబాద్లోని నాంపల్లి కోర్టు అనుమతి ఇచ్చింది. ఈడీ అధికారులు గురువారం నుంచి నిందితులను ప్రశ్నించనున్నారు.
ఈడీ కస్టడీకి అనుమతి పొందిన వారిలో ఆంధ్రప్రదేశ్ స్టేట్ బేవరేజెస్ కార్పొరేషన్ లిమిటెడ్ (ఏపీఎస్బీసీఎల్) మాజీ మేనేజింగ్ డైరెక్టర్ దొంతిరెడ్డి వాసుదేవ రెడ్డి, మాజీ మంత్రి కారుమూరి నాగేశ్వరరావు కుమారుడు కారుమూరి సునీల్, అలాగే రాజ్ కసిరెడ్డి ఉన్నారు. వీరిని గత జూన్ నెలలో అరెస్ట్ చేయగా, అప్పటి నుంచి జ్యుడీషియల్ రిమాండ్లో ఉన్నారు.
తాజాగా ఈడీ దాఖలు చేసిన కస్టడీ పిటిషన్పై విచారణ జరిపిన నాంపల్లి కోర్టు, ముగ్గురు నిందితులను మూడు రోజుల పాటు ఈడీ కస్టడీకి అప్పగిస్తూ ఉత్తర్వులు జారీ చేసింది. ఈ సమయంలో కేసుకు సంబంధించిన ఆర్థిక లావాదేవీలు, టెండర్ ప్రక్రియలో జరిగిన అక్రమాలు, నిధుల మళ్లింపుపై ఈడీ అధికారులు లోతుగా విచారణ చేపట్టనున్నారు.
గత ప్రభుత్వ హయాంలో ఏపీఎస్బీసీఎల్ మద్యం రవాణా టెండర్లలో నిబంధనలను ఉల్లంఘిస్తూ మార్పులు చేసినట్లు ఆరోపణలు ఉన్నాయి. ఈ అక్రమాల వల్ల రాష్ట్ర ప్రభుత్వ ఖజానాకు సుమారు రూ.195 కోట్ల నష్టం వాటిల్లినట్లు ఈడీ ప్రాథమిక దర్యాప్తులో గుర్తించింది.
ఈ కేసును మనీలాండరింగ్ నిరోధక చట్టం (PMLA) కింద నమోదు చేసిన ఈడీ, ఆర్థిక లావాదేవీలపై మరింత లోతుగా దర్యాప్తు కొనసాగిస్తోంది. నిందితుల విచారణలో మరిన్ని కీలక విషయాలు వెలుగులోకి వచ్చే అవకాశం ఉందని అధికార వర్గాలు భావిస్తున్నాయి.