సోషల్ మీడియా రీల్స్ కోసం చేసే ప్రమాదకరమైన విన్యాసాలు ఎంతటి విషాదాలకు దారితీస్తాయో రంగారెడ్డి జిల్లాలో జరిగిన ఈ ఘటన మరోసారి స్పష్టం చేసింది. సరదాగా స్నేహితులను భయపెట్టాలనే ఉద్దేశంతో విషపామును చేతిలో పట్టుకున్న ఓ యువకుడు చివరికి అదే పాము కాటుకు బలయ్యాడు.
రాజేంద్రనగర్ పరిధిలోని కిషన్బాగ్ ప్రాంతానికి చెందిన నవాబ్ సయ్యద్ కుమైలు మొహియుద్దీన్ హుస్సేనీకి సోషల్ మీడియాలో రీల్స్ రూపొందించడం అంటే ఎంతో ఇష్టం. తరచూ కొత్త కొత్త వీడియోలు చేస్తూ స్నేహితులతో పంచుకునేవాడని స్థానికులు చెబుతున్నారు. అయితే ఈ ఆసక్తే అతని ప్రాణాలను బలిగొన్నట్లు తెలుస్తోంది.
రెండు రోజుల క్రితం హుస్సేనీ ఓ కట్లపామును (విషసర్పం) పట్టుకుని రీల్ చిత్రీకరణ చేపట్టాడు. పాము తలను తన చేతిలో బిగించి పట్టుకోగా, అది అతని చేతికి చుట్టుకుంది. ఈ దృశ్యాలను వీడియోలో చిత్రీకరిస్తూ అక్కడే ఉన్న స్నేహితులను భయపెట్టేందుకు ప్రయత్నించాడు. పామును చేతిలో పట్టుకుని నవ్వుతూ, సరదాగా వ్యవహరిస్తున్న సమయంలో ఒక్కసారిగా ఆ పాము అతని చేతిని బలంగా కాటేసింది.
కాటు వేసిన వెంటనే పాము కోరలను తొలగించుకుంటూ, తనను పాము కాటేసిందని హుస్సేనీ స్నేహితులకు చూపించాడు. మొదట్లో అతడు కూడా దాన్ని పెద్దగా పట్టించుకోలేదని, కేవలం చిన్న గాయమేమో అనుకున్నాడని సమాచారం. కానీ కొద్ది సేపటికే ఆరోగ్య పరిస్థితి విషమించడంతో స్నేహితులు వెంటనే సమీప ఆసుపత్రికి తరలించారు.
వైద్యులు చికిత్స అందించినప్పటికీ విష ప్రభావం వేగంగా వ్యాపించడంతో సుమారు మూడు గంటల వ్యవధిలోనే హుస్సేనీ మృతి చెందినట్లు తెలుస్తోంది. ఈ ఘటన కుటుంబ సభ్యులను, స్నేహితులను తీవ్ర విషాదంలో ముంచెత్తింది.
గురువారం శివరాంపల్లి బెస్ట్ ప్రైస్ సమీపంలోని ఖాద్రీ హిల్స్ మస్జిద్ ముహమ్మద్ అలీ ఖాన్ వద్ద అతనికి చివరి ప్రార్థనలు నిర్వహించారు. అనంతరం కుటుంబ సభ్యులు, బంధుమిత్రుల సమక్షంలో అంత్యక్రియలు పూర్తి చేశారు. మృతుడి ఆత్మకు శాంతి చేకూరాలని, కుటుంబానికి ధైర్యం ప్రసాదించాలని ప్రత్యేక ప్రార్థనలు నిర్వహించినట్లు స్నేహితులు తెలిపారు.
ప్రమాదకర రీల్స్పై హెచ్చరిక
ఈ ఘటన సోషల్ మీడియా కోసం ప్రాణాలతో చెలగాటమాడడం ఎంత ప్రమాదకరమో మరోసారి గుర్తు చేసింది. పాములు సహజంగా తమకు ముప్పు వాటిల్లిందని భావించినప్పుడు మాత్రమే దాడి చేస్తాయని అటవీ శాఖ అధికారులు చెబుతున్నారు. విషసర్పాలను పట్టుకోవడం, వాటితో వీడియోలు తీయడం, సెల్ఫీలు దిగడం వంటి చర్యలు ప్రాణాంతక పరిణామాలకు దారితీసే అవకాశం ఉందని హెచ్చరిస్తున్నారు.
“ఒక రీల్ కోసం చేసిన నిర్లక్ష్యం… ఓ కుటుంబంలో తీరని విషాదాన్ని మిగిల్చింది” అంటూ స్థానికులు ఆవేదన వ్యక్తం చేస్తున్నారు.
