తెలంగాణ రాష్ట్ర ఆవిర్భావ దినోత్సవం సందర్భంగా ముఖ్యమంత్రి రేవంత్ రెడ్డి, మాజీ ముఖ్యమంత్రి కేసీఆర్ చేసిన ట్వీట్లు రాజకీయ వర్గాల్లో చర్చనీయాంశంగా మారాయి. ఒకవైపు కాంగ్రెస్ ప్రభుత్వం అభివృద్ధి, సంక్షేమం, పారదర్శక పాలనపై దృష్టి సారిస్తోందని రేవంత్ రెడ్డి పేర్కొనగా.. మరోవైపు తెలంగాణ సాధించిన ప్రగతి దెబ్బతినకుండా ప్రజలు అప్రమత్తంగా ఉండాలని కేసీఆర్ సూచించారు.
రేవంత్ రెడ్డి రాష్ట్ర సాధన కోసం ప్రాణత్యాగాలు చేసిన అమరవీరులకు నివాళులర్పిస్తూ, ప్రజల ఆకాంక్షలకు అనుగుణంగా జవాబుదారీతనంతో కూడిన పాలన అందిస్తామని హామీ ఇచ్చారు. రైతులు, మహిళలు, నిరుద్యోగ యువత సంక్షేమమే ప్రభుత్వ లక్ష్యమని స్పష్టం చేశారు.
కేసీఆర్ మాత్రం బీఆర్ఎస్ హయాంలో తెలంగాణ దేశానికే ఆదర్శంగా నిలిచిందని పేర్కొన్నారు. సాగునీరు, వ్యవసాయం, విద్యుత్ రంగాల్లో సాధించిన విజయాలను గుర్తుచేస్తూ రాష్ట్ర అస్తిత్వాన్ని కాపాడుకోవాల్సిన అవసరం ఉందన్నారు. ప్రజలకు ఇచ్చిన హామీలను ప్రస్తుత ప్రభుత్వం అమలు చేయాలని సూచించారు.
