కేంద్ర విద్యాశాఖ మంత్రి పదవికి ధర్మేంద్ర ప్రధాన్ రాజీనామా చేసిన నేపథ్యంలో కేంద్ర మంత్రి కిషన్ రెడ్డి స్పందించారు. ఈ మేరకు ‘ఎక్స్’ వేదికగా ఆయన తన స్పందనను తెలియజేశారు. విద్యార్థి దశ నుంచే ఉద్యమాల్లో చురుగ్గా పాల్గొంటూ, దశాబ్దాల పాటు ప్రజా సేవకు అంకితమైన ధర్మేంద్ర ప్రధాన్ యువత ఆశయాలు, ఆకాంక్షలకు ఎల్లప్పుడూ చేరువగా ఉన్నారని కొనియాడారు.
విద్యార్థి నాయకుడిగా తన ప్రస్థానాన్ని ప్రారంభించిన ధర్మేంద్ర ప్రధాన్, యువత ఎదుర్కొనే సమస్యలతో పాటు విద్య ద్వారా వచ్చే పరివర్తనపై క్షేత్రస్థాయిలో లోతైన అవగాహన కలిగి ఉన్నారని కిషన్ రెడ్డి పేర్కొన్నారు. ఈ అనుభవంతోనే ఆయన విద్యాశాఖ బాధ్యతలను అత్యంత సమర్థవంతంగా నిర్వహించారని అభిప్రాయపడ్డారు. విద్యారంగంలోని క్లిష్టమైన సవాళ్లను సమన్వయం చేస్తూనే, విద్యా అభ్యాసన శక్తిపై పూర్తి విశ్వాసంతో ఆయన పనిచేశారని గుర్తుచేసుకున్నారు.
భారతదేశ విద్యారంగానికి ఆయన చేసిన సేవలు చిరస్మరణీయమని, దేశ విద్యార్థుల సంక్షేమం పట్ల ఆయన చూపిన నిబద్ధత, జాతి నిర్మాణంలో ఆయన అందించిన అమూల్యమైన సహకారం ఎప్పటికీ గుర్తుండిపోతాయని ప్రశంసించారు. కేంద్ర మంత్రిగా ధర్మేంద్ర ప్రధాన్ అందించిన అంకితభావంతో కూడిన సేవలకు కిషన్ రెడ్డి ఈ సందర్భంగా ధన్యవాదాలు తెలియజేశారు.
